سوندا نە ايتتى دەيسىز عوي. جاستارعا ارنالعان باعدارلاما بولعاندىقتان اڭگىمە اۋانى تۇسىنىكتى شىعار... بولاشاقتاعى ايگىلى اكتريسا مەكتەپ ءبىتىرۋ كەشىندە سىنىبىنداعى ۇزدىك قىزدىڭ جىگىتىن تارتىپ الۋ ماقساتىندا كۇلگىن ءتۇستى سترينگ كيىپ, كەش سوڭىندا دەگەنىنە جەتىپتى. باقتالاسىن قالپاقتاي ۇشىرىپ, قولىنداعىسىن قاعىپ كەتكەنىنە ماسايراعان كەمەرون سول ساتتەن باستاپ كۇلگىن سترينگتى تۇمارىنا اينالدىرعان ەكەن. جۇرگىزۋشىلەر ءماز. «كۇلگىن سترينگ ماقساتىڭا جەتكىزەدى», دەيدى جابىلا ك ۇلىپ. نەگە شاقىرىپ وتىرعانىن پايىمداي بەرىڭىز.
قازىر بەيباستاقتىقپەن دە اتىڭدى شىعارىپ, تانىمال بولۋعا بولادى دەگەن ۇعىمدى جاسوسپىرىمدەرگە ەفيردەن, ينتەرنەتتەگى توك-شوۋلاردان, الەۋمەتتىك جەلىلەردەن ءسىڭىرۋدىڭ جويقىن شابۋىلى ءجۇرىپ جاتىر.
الەۋمەتتىك جەلىدە جالاڭاش سۋعا تۇسكەنىن كورسەتىپ, كۇيەۋىمەن ايىرىلىسقان, 2 بالاسىن اتا-ەنەسىندە قالدىرعان كەلىنشەك «قالاۋلىم» باعدارلاماسىنىڭ «جۇلدىزى», كەيىپكەرى اتاندى. ەفيردە وتىرىپ-اق «... ايىرامىن» دەپ بوعاۋىز ايتاتىن, ودان ءوز پاراقشاسىنداعى تىكەلەي ەفيردە «...دىر-دىر قاسىپ وتىرعاننان باسقا جۇمىسىڭ جوق» دەيتىن بەيپىلاۋىزدى وسى كەلىنشەكتى تاعى ءبىر تەلەجۇرگىزۋشى ينتەرنەت-سۇحباتقا شاقىردى. ول «قاي جۇلدىزبەن توسەك قاتىناسىنا بارعىڭىز كەلەدى؟ توسەك قاتىناسىن ۇسىناتىن جىگىتتەر كوپ بولا ما؟», دەيدى انايىلىعىمەن شۋلاتىپ جۇرگەن «قالاۋلىم» باعدارلاماسىنىڭ كەيىپكەرىنە. «بۇگىنگى ءسىز بەن ءبىزدىڭ كەزدەسۋىمىزدىڭ ءوزى سەنى ەل تانيتىندىقتان, وسى سۇحباتقا سوندىقتان شاقىرىپ جاتىرمىن, جالپى كىمدەر تانىپ جاتادى؟» دەيدى ول. الگى كەلىنشەك «ول جايىندا ويلاپ كورمەپپىن, ماعان ناتاشا كورولەۆانىڭ كۇيەۋىنىڭ دەنە ءبىتىمى ۇنايدى, تارزان دەسەم بولادى», دەپ جاۋاپ قاتادى.
ماقساتتارى نە؟ انايى, بەيباستاق ادامدار ارقىلى كورەرمەن جيناپ, رەيتينگ كوتەرۋ مە؟ الدە استارىندا وزگە دە جامان وي جاتىر ما؟ باياعىدا ەلوردا العاش ارقاعا كوشىپ كەلگەندە «قازاقستان» ارناسىنىڭ «استانا» ستۋدياسىندا دۇكەش بəيىمبەتوۆپەن بىرگە جۇمىس ىستەدىك. سوندا اعا: «ولاردىڭ ساياساتى بەلگىلى عوي. ورت-دا مەنشىكتى ءتىلشى بولىپ جۇرگەندە مəسكەۋگە ەل جايىندا سيۋجەت جىبەرسەم, تاتيانا ميتكوۆا «دۋكەش, تى چتو نام تاكيە سيۋجەتى وتپراۆلياەش, تى نام جارەنوگو پوداۆاي» – دەپ, جاقسى نəرسە جىبەرسەم جاڭالىقتارعا سالماي, ال سəل ءبىر جاعىمسىز دۇنيە بولسا قۇتىرتىپ تۇرىپ بەرەتىن», دەپ əڭگىمەلەگەنى بار. سول ءتəرىزدى قازاقستاندا وتىرىپ-اق ەل جاڭالىقتارىن بەرىپ جاتقان وسى «1 ارنا» اقپاراتتارىن, سيۋجەتتەرىن تىڭداپ كورىڭىزشى. «استانادا گەيشا شەبەرلىگىن ۇيرەتەتىن مەكتەپ ەكى جىلدان بەرى جۇمىس ىستەپ جاتىر. مۇندا كۇيەۋىنىڭ كوڭىلىن اۋلاۋدىڭ قىر-سىرىن, ەر كىسىلەردىڭ پسيحولوگياسىن ءتۇسىنۋ, جاقسى انا بولۋ, وتباسىن ساقتاپ قالۋ جانە ءتۇرلى تاعامدار ازىرلەۋدەن باستاپ, سەكسۋالدى ومىردەگى شەبەرلىكتەرگە دەيىن ۇيرەتەدى» دەپ قۇلاقتاندىرىپ جاتىر.
ءاربىر وركەنيەتتى مەملەكەت ءوزىنىڭ اقپاراتتىق ايدىنىن, ەل بولاشاعى – بالالاردىڭ, ءجاسوسپىرىمنىڭ قالاي جەتىلىپ كەلە جاتقانىن قورعاپ ولاردىڭ كەلەشەگىنە قام جەۋگە مىندەتتى. بۇل – پارىزى, ۇلت قاۋىپسىزدىگى, ەل ەرتەڭى ويىنشىق ەمەس. ماسەلەن اقش-تا تىيىم سالعان فيلمدەر بار ەكەنى ايان. ارنولد شۆارتسەنەگگەر تۇسكەن كينولاردى امەريكالىق بالالار كورمەيدى. ولار كىسىنى قاتىگەزدىككە, جاۋىزدىققا بوي ۇيرەتۋگە الىپ كەلەتىن ونداي دۇنيەلەرىن وزگەلەردىڭ بالالارىنا كورسەتەدى. جاپونيادا دا جاپون حالقىنىڭ تانىمىنا قايشى كەلەتىن دۇنيەلەردى تاراتۋشىلار زاڭمەن جازالانادى. نەگە ولاي دەپ ەشكىم وكپەلەي المايدى. ويتكەنى بۇل تۇپتەپ كەلگەندە مەمەكەتتىڭ قاۋىپسىزدىگىنە قاتىستى ماسەلە. قاۋعاداي بولىپ, قاۋديا وسكەنىمەن تامىرىنان قول ۇزگەن, جەل الدىندا كۇشى جوق قاڭباقتىڭ قايدا بارىپ توقتارىن كىم بىلەر؟
ال ءبىزدىڭ زاڭ قايدا؟ زاڭ شىعارۋشى ورگان مەن راديوجيىلىكتەرگە رۇقسات بەرۋشى قۇزىرلى ورگاننىڭ ۇندەستىگى قايدا؟ نەگە ەلىمىزدەگى تەلەراديو, الەۋمەتتىك جەلى, بارلىق باق-قا بەيباستاقتىقتى, جاماندىقتى, قاتىگەزدىك پەن حالىقتىق بىتىمگە جات كىساپىرلىكتى كورسەتۋگە تىيىم سالىنبايدى. وسىعان سايكەس زاڭ قابىلدانىپ, ونى بۇزعاندار جاۋاپ بەرۋى كەرەك ەمەس پە؟
الدە سەنساتسيا قۋعاننىڭ ءجونى وسى دەپ وتىرا بەرۋ كەرەك پە؟
انار تولەۋحانقىزى,
«ەگەمەن قازاقستان»
